《頭條新聞》也有Plan B

【明報專訊】噚晚記者協會舉行45周年籌款晚宴，唔少立法會議員、商界人士現身，亦成為記者聚頭嘅場合。主禮嘉賓、中大校長沈祖堯就話，佢呢世人最驚三類人，就係中學老師、牙醫同記者喎，因為呢三類人都會令佢擘大個口得個窿，而記者就最鍾意問佢唔識答嘅問題。


沈祖堯「最驚記者」

記協晚宴主題係「企硬」，沈祖堯就話佢屋企人都「企硬」，皆因佢囡囡夜晚要搭機出外讀書，老婆要佢返屋企送佢哋去機場，令佢唔可以坐足全晚。校長咁講，嚇到記協主席麥燕庭送一對柿形雕塑紀念品畀佢時，原本想以諧音講「此情永在」，但就講成「此情不在」，搞到全場大笑起哄。


噚晚另一高潮，就係《頭條新聞》嘅太后與小豪子移師會場，佢哋不時窒盡時事，例如話政府已低調發咗免費電視牌畀佢哋呢個大清台，佢哋會推出《悠長假期之行政會議》，諷刺林奮強長期請假；另一節目叫《金枝綠葉之Plan B》，湊合現時流傳話特首梁振英有可能下台嘅新聞。


林健鋒唔學張震遠借錢

太后表演完就到揼心口環節，主持先搵醫管局主席胡定旭，肥胡開玩笑咁數晒全場知名人士出嚟，連民主派都唔放過，仲爆公民黨余若薇嘅老公早排喺馬場贏咗好多錢。最終肥胡捐2萬，經民聯林健鋒就自認欠債人士，有人問點解佢唔學張震遠向詹培忠借錢，佢話詹要收利息，所以無借，最後搞咗一輪，佢都捐兩萬。


議員林大輝就要求記協要有Plan先捐，Plan A捐一萬，Plan B捐兩萬，記協梗係點都話有Plan B啦！