端午前夕 中聯辦下令拒收禮

【明報專訊】內地新一屆政府倡議要搞廉政建設，中聯辦不敢怠慢，噚日喺網站發稿，話近日已向中聯辦各部門發通知，重申要嚴格遵守中央關於改進工作作風、密切聯繫群眾嘅8項規定。簡而言之，就係要求中聯辦人員端午節等節慶期間婉拒各類食品、果品禮品喎。


林大輝：端午少送禮

中國人一向會喺節慶日子送禮，禮多人不怪嘛，立法會議員林大輝就話，一般會喺新年、聖誕以及中秋節送禮，端午節就少啲。


講真，端午節嘅禮品通常係糉，不過家賣糉嘅好識做，會做鮑魚、乾貝糉，都唔平㗎，畀商界人士送禮得體啲，中聯辦咁樣提醒，未必無因。


要減應酬 抽獎都冇份

中聯辦話，主任張曉明早喺中聯辦新春酒會已通報，要求中聯辦人員減少一般應酬，嚴禁喺同香港市民交往過程中收受禮金及貴重禮品，出席香港社團組織同公司嘅活動唔參加抽獎，以及婉拒節慶果籃禮籃等。