梁振英六四不在港

【明報專訊】特首梁振英（CY）喺1989年六四事件後，曾經喺報章刊登署名聲明，譴責中共血腥鎮壓，今年六四又近，Emily估計，呢兩日一眾行家見到佢，都會問佢對六四嘅睇法，不過，特首辦就預告，今年六四期間CY會出訪上海。Emily循例問特首辦，CY係咪想避開六四晚會，揀喺嗰日外訪，特首辦就話，CY要喺6月5日朝早喺上海出席活動，所以就要6月4日離港咁講。


特首辦：訪問上海兩日

港府噚日公布，CY會喺6月4日至5日訪問上海，首日將拜會上海市領導，翌日出席第二屆城市土地學會亞太地區峰會開幕禮同致辭。佢仲會參觀上海8號橋創意產業園區、上海航運交易所等。運輸及房屋局長張炳良、發展局長陳茂波等一齊北上。CY離港期間，由政務司長林鄭月娥署理特首嘅職務。