蔡曉慧嘆港回收垃圾難

【明報專訊】前泳后蔡曉慧3年前退役後轉做教練，但作為名將，自然有唔少公益活動想搵佢幫手。Emily見佢近期成日出席環保活動，佢話覺得港人環保意識低，配套又唔夠，於是想出一分力。


以前喺美國讀書嘅蔡曉慧話美國分類回收意識好強，啲居民會先喺屋企將垃圾分開處理，再定時將分類好嘅垃圾放入無處不在嘅回收站，令到佢都養成咗呢個習慣。至幾年前佢回港定居，因為香港無呢方面嘅氣氛同配套，令佢都懶咗落嚟，無以前咁常分類。


搵回收箱行足商場幾層

蔡曉慧舉例話，香港人回收垃圾只係行過見到有回收箱先掉，而且回收箱又細，令回收率跑輸鄰區。好似訪問當日，蔡曉慧同Emily嘅同事為咗搵個回收箱影相，結果喺商場行咗幾層樓梯先搵到。佢話運動員會訂立目標，再排除萬難達到，希望港人同港府喺環保方面都可以好似運動員咁，不受「地少人多、屋企細等藉口阻礙」，繼續向前！