林健鋒感激住過公社

【明報專訊】經民聯成立後，網站不時刊登黨內立法會議員嘅訪問，等大家了解佢哋嘅另一面，噚日被訪問嘅就係副主席林健鋒。林健鋒爸爸林亮係香港第一代「膠鴨之父」，令大家都知佢係出身玩具世家，林健鋒原來都唔算「二世祖」，年輕時就做過北上創業嘅開荒牛，試過喺無熱水冲涼、無冷氣、俗稱「公社」嘅政府宿舍過夜。


北上創業 日搭5個鐘車去工廠

林健鋒話，當時喺羅湖等過關都要1個鐘，之後仲要花3、4個鐘坐「麵包車」去工廠，一日時間已所剩無幾，有時都要喺當地過夜，住喺公社入面，就算天氣幾凍，都要喺露天冲涼房用井水冲涼。佢形容呢個係佢人生嘅難得經驗，磨練到佢嘅堅忍同應變能力。


磨練到堅忍應變力

林健鋒從商，但原來佢細個時嘅理想係做教師，佢話因為當年有機會去外國讀書，所以希望可以同香港年輕人分享，但佢最終都喺家人游說下，返港協助老竇打江山，無實現佢嘅理想。