陳振彬18區盃賽拉頭馬

【明報專訊】香港政府搞「家是香港」希望凝聚市民，不過搞咗乜嘢活動，市民未必清楚。但如果係馬迷嘅話，都應該留意到噚日有場賽事係「家是香港盃」，另一場就係搞咗幾年嘅「18區盃」賽，兩場賽事都請到官員頒獎，其中喺18區盃賽事上，咁啱做咗18區區議會輪任主席嘅陳振彬名下有馬出戰，呢隻「傳奇快車」好生性，以小小爆冷嘅姿態勝出，畀老細同一班區議會主席一齊拉頭馬威威。最實際係陳振彬攞到幾十萬獎金，唔怪得民政事務總署長陳甘美華頒獎畀佢時，陳振彬笑到見牙唔見眼。


至於家是香港盃，馬匹「怡勝」贏得冠軍，政務司長林鄭月娥將刻有家是香港標誌嘅獎盃頒畀馬主怡和團體，一眾馬會「大董」，好似人大常委范徐麗泰、前局長葉澍堃等都有現身頒獎禮。