維園講六四 民建聯唔得閒

【明報專訊】港台節目《城市論壇》每星期都有立場屬建制派嘅維園阿伯，同埋民建聯、自由黨等青年團嘅代表撐場，為政府護航之餘亦爭取曝光。不過噚日《城市論壇》講六四，民建聯等建制政黨就消失晒，台下觀眾亦好少建制派意見，公民黨毛孟靜等講者仲不時贏得歡眾喝采聲，同過去情况都幾唔同。


噚日節目討論平反六四，愛國愛民呢個口號，台上講者清一色民主派，除咗毛孟靜、支聯會主席李卓人、時事評論員劉銳紹外，另一個就係唔贊成每年六四儀式化，但同樣都支持要悼念嘅「港人自決藍色起義」發言人陳梓進。


話有嘢做唔嚟

主持謝志峰話，呢個話題上無打算請建制派出席，覺得今次呢個嘉賓組合幾好，佢話過去每個禮拜青年民建聯都會致電佢哋預留位置，但早幾日就收到佢哋電話，話有嘢做唔出席喇。至於自由黨雖然無拉隊到場，但都有一名成員發言，話六四係悲劇、歷史自有公論云云。