梁美芬：協恩「補飛」請范太

【明報專訊】協恩中學學生會早前邀請「佔領中環」發起人戴耀廷喺5月22日到校內出席論壇，被唔少親中報章批評。經民聯立法會議員梁美芬，噚日喺facebook分享《文匯報》一篇署名評論，題為〈協恩校長與學民思潮荼毒學生參與「佔中」〉，唔通梁博士好like文章觀點？梁博士其後接受查詢時話，原來佢覺得協恩請完戴耀廷後，先至再請全國人大常委范徐麗泰，係「補飛」咁話。


話佔中深奧 唔啱教通識

梁博士話，原來早在事件喺報章曝光前，協恩已邀請佢講佔中，後來請咗范太先至無請佢。我哋問過協恩發言人，佢話早喺5月已經同家長講清楚7月會有另一場講座，邀請建制派人士，絕對唔係「補飛」，希望梁「唔好扭曲」咁話。發言人話，佢哋的確係口頭問過梁博士時間，但邀請咗范太後，已經同梁博士解釋，未決定有再多一輪講座，所以請唔到佢，從來無正式去函請梁博士來訪。


對於中學生應否談佔中，梁博士喺電話中同Emily講，覺得佔中行動根本太深奧，中學生唔可以好好掌握，連佢啲助理都消化唔到，根本唔適合用嚟教通識咁話。