葉劉喜見無味神探復工

【明報專訊】做過保安局長嘅新民黨主席葉劉淑儀，不時都會出席紀律部隊嘅活動，佢噚日就喺facebook上載咗幾張相片，講佢上周五出席香港警務督察協會周年聚會，其中最令人高興嘅，係1992年警匪槍戰頭部中彈後奇蹟生還嘅「無味神探」陳思祺，雖然上年患上末期肺癌，但生命力好強嘅佢，經過一年治療後已經復工，重返警隊崗位。


治療一年 戰勝末期肺癌

葉太話，佢當日見到陳思祺，覺得佢好精神，而且康復得幾好。因為上年陳思祺患癌時，新民黨曾為佢籌款，所以陳思祺當晚亦向佢表示謝意。葉太話，雖然陳思祺患病，但都未有放棄，接受近一年治療後，病情受控，再次戰勝死神。陳思祺已經喺今年農曆新年前復工，重返防止罪案科崗位，葉太讚揚陳思祺生命力頑強，稱得上係真正嘅男子漢。


至於曾經係新民黨成員嘅廖潔明當晚亦有現身，唔做地區工作後，原來家喺美國駐港總領事館返工，擔任保安部成員。