學運孖妹齊紋身

【明報專訊】特首梁振英上月去將軍澳明愛專上學院出席活動時，學生向梁抗議，當時疑被一男督察「熊抱」嘅學運女將何潔明，因事件曝光率大升。其實，潔明同孖生家姐潔泓近年一齊走喺學運前線，佢哋除咗樣貌相近、志趣相投，仲一齊喺手臂紋身，家姐紋咗《國際歌》最後兩句喺左手，細妹紋咗「Reunion」喺右手，話要紀念去世嘅外婆，希望將來可以再聚。


家姐紋《國際歌》歌詞

兩姊妺噚日出席商台節目《在晴朗的一天出發》講社運。孖女話，其實佢哋之前都同時下年輕人一樣，愛唱K、睇台劇，報紙只睇娛樂版。直到反高鐵一役，佢哋好奇之下，去咗立法會門外嘅反高鐵集會，見到一向唔算太關注時事嘅媽媽，自此三母女除咗留意社會時事新聞，仲成日一齊討論，造就咗今日嘅社運孖女。


親戚：你唔係瞓街咩？

講起學運女前輩，家姐話好記得早幾年嘅港大學生陳巧文，喺一場示威中，爬上舊政府總部嘅大樹上示威，令佢驚覺原來示威都可以有好多另類方式。


家喺嶺大讀哲學嘅家姐話，畢業後仍會繼續參與社會運動有關工作，唔會去大財團打工。不過，唔係人人都支持佢哋搞社運，有親戚見到問佢哋：「你唔係要去瞓街嘅咩？」