歐達禮「動物」論 惹不滿

【明報專訊】喺立法會內，中港矛盾小琴就見得多，中英文義上的分歧就好少見，噚日小琴就有幸見識到。證監會行政總裁歐達禮一句，話商交所與證券商係「 two entirely different animals」，即時辣㷫立法會券商代表張華峯。


話說噚日嘅會議討論商交所事件，議員質疑證監對待商交所，同對待證券行唔同。歐達禮就好坦白say yes，因為證券行會持有客戶資產，而商交所唔會，仲話佢地係「two entirely different animals」（直譯是「兩種完全不同的動物」）。


張華峯斥經紀不是「動物」 是專業

其實歐達禮嘅意思係指兩類機構確不相同，但張華峯就好激氣，即刻起身話「業界唔係動物，係專業人士」，要求歐收回字眼。連民主黨嘅涂謹申同何俊仁都話，希望唔好再用呢個字。石禮謙仲搬《聖經》出嚟，話上帝造人，係依照自己嘅模樣，所以人同動物係有分別。


字典意指不同嘅種類

歐達禮最初都笑笑口話，佢哋係「person（人）」 ，但咁多位議員持續斟酌呢個字眼，都令到佢有啲愕然。小琴事後問過啲教英文嘅朋友，佢地話西人咁講法十分普遍，意指不同嘅種類，字典亦有，並無侮辱他人嘅意思。


不過，張華峯開完會出嚟仲係好勞氣，仲問記者，「如果佢話記者係動物，你嬲唔嬲？」唉，這可說是中西文化嘅差異。


email: [email protected]