民主黨派六四扇 新同盟百蚊賣櫈

【明報專訊】每年六四無論幾熱幾擠迫，數以萬計嘅港人仍會繼續迫爆維園，各黨派今年製作咗唔同嘅宣傳品派畀出席者。民主黨今日將喺維園出入口，向市民免費派發3萬把六四紙扇，紙扇前面係「6424」四個字，寓意六四24周年，後面印《自由花》歌詞。民主黨創意媒體部長黎敬瑋話，往年六四晚會都好熱，希望攞咗扇嘅市民可以即場「解暑」。


盼助市民解暑

另外，之前設計咗「佔領中環TEE」籌款嘅新民主同盟范國威話，呢兩年政改同佔中都會紛爭不斷，遊行示威少不了，所以製作「佔中摺凳」，等參加者坐都坐得舒服啲，加上可以窒埋成日話帶摺櫈落區嘅特首梁振英。每張櫈承惠100蚊，佢話部分籌款所得會捐畀佔中，其餘作為新民主同盟地區工作經費。