電能推低碳餐 響應環境日

【明報專訊】全球暖化日益嚴重，小琴真係深深感受到保護環境，減低碳排放嘅重要性。而且要做到節能減碳，除咗減少使用汽車出入之外，原來響食嘢方面注意一啲，都可以達到減碳效果，好似電能實業（0006）就會響聽日「世界環境日」，為員工炮製「低碳午餐」，董事總經理尹志田仲提前幫員工試過味，好食先至拎出嚟。


小琴問電能公關拎咗份菜單睇下，前菜係手拍黃瓜，主菜車厘茄蝦意粉，仲有甜品啤梨果凍。公關解釋，食晏都可以環保，其實主要靠兩點，一就係選擇本地食材，減少運輸同儲存；而用涼拌烹調手法，少用猛火同長時間煮食，既可節約能源，亦防止營養流失；佢仲同小琴講，聽日呢份「低碳午餐」會響員工飯堂供應，每客只係幾廿蚊，而產生嘅碳排放量只有1千克唔夠，熱量亦只有410卡路里，比起平時食個漢堡包餐，唔單止卡路里更少，碳排放量亦都少成三分之一。