啜核長毛：大話是人講的

【明報專訊】噚日網上一段片段，係維園六四燭光晚會散場後，長毛梁國雄同愛港之聲主席高達斌對話，有被指為撐政府勢力嘅愛港之聲中人話，八九年六四天安門無死過人，惹嚟一啲參與晚會嘅市民反駁話佢講大話；長毛就笑笑口同圍觀市民講﹕「你哋唔好侮辱『大話』呢兩個字，大話係人講嘅，所以你哋唔好話佢講大話呀！」醒目嘅市民隨即心神領會，起哄一番，高達斌等人無乜反應，有人就形容長毛一句就KO咗高達斌喇。


夜媽媽仲要同愛港之聲嘅人「討論」，都好花精神同時間，雖然旁觀者興致勃勃想睇長毛出手，但長毛就唔係好想，反而佢直接向高達斌下戰書，邀請同對方網上辯論六四。


高達斌﹕欲解釋六四真相 非踩場

Emily噚日問番高達斌，點解愛港之聲成班人去六四晚會踩場，佢就話幾個成員係以個人身分，等晚會完咗9點幾先入場，話想主動搵市民解釋六四真相，唔係踩場喎。佢仲話早知有準備，攞多啲證據去維園。高達斌又話唔覺得長毛嘅「大話論」係話緊佢，如果長毛真係同佢辯論，佢話好歡迎，咁真係要拭目以待喇。