議員一身綠 響應環境日

【明報專訊】唔少立法會議員都話為綠色環境表態，噚日係世界環境日，香港都響應。經民聯梁美芬身兼環保促進會主席，由頭到腳都係綠色，手袋尤其搶眼。梁博士就話今年興綠色，所以買咗個美國品牌DKNY手袋，唔算名牌咁話。不過，「綠色」嘅意思好似係叫大家唔好咁消費，唔知梁博士明唔明呢？


梁博士又派咗書籤畀Emily，原來書籤內有乾坤，中間包住種子，可以攞番屋企種植。佢又專登喺WhatsApp群組叫成班議員要著綠色衫，唔少人都畀面，好似葉劉淑儀同謝偉俊都着咗綠色褸。


EQ潛入海洋公園大魚缸

世界環境日過咗，6月8日就係世界海洋日，民建聯議員葛珮帆（EQ）日前去海洋公園大魚缸潛水，成為首個潛入海洋公園大魚缸嘅立法會議員，佢話除咗鯊魚，仲有好多魚類，好似蘇眉、藍鰭吞拿魚等目前受生態威脅，呼籲大家坐言起行，停止濫捕濫殺。