戲曲中心英譯仲要諮詢

【明報專訊】西九管理局諮詢會早幾日召開第10次會議，討論戲曲中心名稱英譯是否應該叫做「Xiqu Centre」。最終，近半委員贊成用「Chinese Opera House」 ，有關建議會匯報畀董事局再諮詢。


西九表演藝術行政總監茹國烈噚日話，今次會議內容好寶貴，家仍會持開放態度，諮詢業界同學者意見，唔會急於落實最終方案。講到將來或者會集中討論用Xiqu定係Chinese Opera，唔會再有第3個方案。


兩個譯名爭議，各界各執一詞，中大文化管理碩士課程主任何慶基話，個人支持用Chinese Opera，因為中心嘅英譯，主要作用係畀對象清楚了解意思，加上大部分港人覺得唔舒服，用Xiqu保留本土性同民族情意結，就唔係首先考慮。


立法會體藝、文化及出版界議員馬逢國話，其實Opera一詞本身原自意大利歌劇，中國戲曲根本唔啱，「大家覺得Xiqu有問題，咁用Opera都有問題，西方歌劇可唔可以叫Western Xiqu？」佢舉例，日本歌舞伎英譯都係用拼音嘅Kabuki，所以重點都係想英譯傳達出乜嘢信息。