聶德權自認「好捱得」

【明報專訊】下禮拜一開始，社署署長聶德權就會調去幫政務司長林鄭月娥，出任政務司長辦公室專員，專做扶貧及人口工作。噚日喺傳媒茶敘時，被問到去幫「好打得」嘅林鄭有何準備時，聶署長笑言早有心理準備知道未來工作會繁忙，仲笑住話自己都「好捱得」，大家唔使太擔心。至於林鄭點樣「招攬」到佢去做呢個任期只係半年嘅「專員」工作時，聶德權只係話，佢收到電話通知佢要調職，半年後工作再等安排。


專責扶貧人口 任期半年

Emily數數手指，發現2009年8月起出任社署署長嘅聶德權，做咗接近4年，經歷兩朝特首，但都係跟住勞福局長張建宗。有記者笑住問佢點評價張建宗，聶答得好大體，話無論林鄭與張建宗都係好能幹及有心嘅人。


回看社署工作，聶德權話長者生活津貼推出至今，已有逾31萬人申請，但問到爭議多年要綜援申請人子女簽「衰仔紙」嘅措施會否改動時，聶就堅持安全網措施，須按家庭單位為原則。


記者都係關心佢新工作內容細節，佢話要等上任才有得講，至於現時社會政治化，出乜政策都容易死，本身係基督徒的署長就話「I do my best, God will do the rest」咁話。