搵《致青春》女主角拍片

【明報專訊】內地電影市場好火爆大家都知，趙薇執導嘅《致青春》喺內地收穫7億元票房，片中女主角江疏影就成為新一代女神。舊年上市嘅香港牀上用品品牌卡撒天嬌（2223），原來早喺致青春上映之前就搵江疏影拍咗一部10分鐘嘅微電影。由於當時江仲係未出名，所以整部片製作費僅30萬人仔。


卡撒天嬌副主席鄭斯燦話，當時有製作公司推薦江，話佢接拍咗趙薇一部戲，有潛質但人仲未紅。「當時我哋有君子協議，無論趙薇套戲表現點，都唔可以隨便加價。」而嗰套微電影叫《色彩日記》，家喺內地戲院播正式片之前會插播，網上都有得睇。故事講江飾演嘅一個牀品設計師如何突破瓶頸，入邊自然有大段卡撒天嬌牀上用品的特寫鏡頭，鄭生客串番上司。仲得意嘅係入邊有個男童配角仲叫天驕，睇來真係用咗唔少心機。