三色燕鷗數量增

【明報專訊】炎炎夏日，又係遊山玩水嘅好日子，不過，喺郊區活動時要小心自然生態。漁護署噚日公布，最近3年喺香港東北同東南水域嘅大概10處岩石小島展開調查，收集由5月到9月喺香港有繁殖紀錄嘅3種燕鷗：被「雀友」稱為「三色雪糕」嘅黑枕燕鷗、褐翅燕鷗，同埋粉紅燕鷗嘅數量，總數平均錄得約1600隻，趨勢逐年增加。


漁護署濕地及動物護理主任（鳥類）馬嘉慧話，希望透過調查，掌握3種燕鷗每年喺香港數量嘅增減趨勢，從而追查成因。由於要保護燕鷗嘅繁殖地點，佢向Emily提示，如果市民想睇呢3種燕鷗，可以試吓搭船經東平洲、馬料水、塔門或赤柱嘅路線，沿途就有機會見到。


若撞正繁殖地 勿近巢蛋雛鳥

佢又話，署方印製睇燕鷗守則放上網站，提醒市民原來野外可以有咁多珍貴嘅雀鳥，要提高警覺。例如夏天正值呢3種燕鷗嘅繁殖季節，如果撞正喺佢哋繁殖地釣魚或者生態攝影，就唔好接近佢哋嘅巢、蛋同雛鳥。