陳家強晤伯南克 投訴QE3

【明報專訊】財經事務及庫務局長陳家強噚日同一班傳媒朋友茶敘，自爆早兩個月去咗美國訪問期間，向美國聯儲局主席伯南克「投訴」。原來一向文質彬彬嘅局長，見到伯南克時，老實不客氣咁對伯南克話，佢哋個QE3（第三輪量化寬鬆措施）搞到香港好慘情，香港政府要頻頻出招穩定樓市。貴為美國息口嘅話事人，伯南克就好畀面，話香港政府啲辣招「好新穎、有創意」，輕輕帶過呢個話題。


小琴好想知道，伯南克又知唔知啲辣招，搞到香港個樓市靜到無影呢？

伯老讚辣招有創意 迴避投訴

不過，呢期最熱話題始終係iBond。iBond可以話係陳家強局長個「Baby」，講起第一批iBond（即係前年）發行時好多市民走寶，佢笑笑口話，其實一早知道第一批iBond上市首日價錢可以去到106至107蚊，因為條數好易計，睇番當時嘅通脹就大約知道個價值。不過，今次呢批iBond首日掛牌又有幾多上升空間，局長就話無可奉告。


雖然家iBond已經變得大受歡迎，但陳家強不下數次話iBond唔可能年年發，咁有記者追問，可否加添新元素，例如出年期長啲嘅iBond，局長就話技術上可以出10年期嘅iBond，息率參考美國10年期國債，但年期長咗始終風險較大，如果畀零售投資者買，佢有啲擔心。


所以，結論係：唔會囉。


email: [email protected]