吉利李書福 諷北京空氣差

【明報專訊】有陣時無論晴天定雨天，喺北京都只係見到陰天、灰濛濛一片，嗰度啲空氣污染有幾勁，唔使問阿貴都知，最搞笑連內地車廠老總都攞嚟「抽水」。話說吉利汽車（0175）主席李書福，噚日喺成都財富論壇上話，收購番嚟嘅富豪（Volvo）喺車內空氣技術上，做到「關上車門是北歐，打開車門是北京」。佢擺明寸北歐同北京嘅空氣質素，係天堂與地獄。


「關上車門是北歐 打開車門是北京」

佢仲話富豪啲技術遙遙領先，車入面嘅空氣固之然夠晒新鮮啦，連死氣喉排氣都好乾淨，值得吉利去研究。不過，李總可能唔記得咗，空氣差都關車輛排放廢氣事，咁樣踩北京啲空氣質素，道理上有啲講唔過去喎，隨時都會畀人話番轉頭，「唓！吉利賣少啲車咪改善到啲空氣囉。」