網民港島城邦論諷陳雲

【明報專訊】倡議城邦論嘅學者陳雲發表出位言論，近期變本加厲，滿天神佛之餘，又踩埋支聯會甚至李旺陽嗰度，有人見陳雲喺網界咁紅，喺facebook搞咗個專頁叫做「香港島城邦論」，Emily細心睇吓啲內容，唔少係語帶雙關，以其人之道還治其人之身，諷刺陳雲㗎喎。


陳雲鼓吹香港城邦自治論，呢個專頁就鼓吹「港島」自治，主旨就話：「不願與九龍新界切割，香港島城邦只會萬劫不復。大香港膠，逆天而行，必下地獄。」呢啲用字正正係走陳雲風格，專頁嘅留言仲不時出現一個名：「塵暈」，佢就係用陳雲嘅邏輯，推至極致，大倡港島自治論。


語帶雙關 網名「塵暈」

呢個「塵暈」留言話，「九龍及新界人來香港島是毁滅了香港島的文化。 我們是隔絕所有九龍及新界人來港島，才可以保存我們的文化」。「塵暈」愈講愈多，仲話民主黨曾喺區議會支持「要求於繁忙時間增設由西區經西隧往九龍東巴士路線」動議，係「出賣港島人利益」云云。愈知道陳雲平日點講城邦論，睇「塵暈」就愈有共鳴。