旅局赴美唔敢「偷運」雲腿

【明報專訊】旅發局今個周末去美國搞嘉年華，宣傳香港旅遊，同團帶咗3名米芝蓮名廚，烹調港式美食。話說旅發局舊年帶咗4個大廚去法國獻技，但因為種種意外，搞到成千隻用嚟做食材嘅蟹蓋畀當地海關扣起，相當蝦碌。今年旅發局醒咗，晨早搵定當地供應商蒐羅食材，但其中一道糯米雞要用嘅雲腿搵極都無，旅發局講明唔敢「偷運」，唯有早啲出發去華人超市落力搵啦！


3米芝蓮廚隨團獻技

今次洛杉磯之行由旅發局新任主席林建岳帶隊，6月14號至16號一連3日搞露天嘉年華，同團嘅3個星級大廚﹕「添好運」點心專門店嘅麥桂培師傅、「名人坊」嘅鄭錦富師傅同「朗豪酒店明閣」嘅曾超烈師傅，將會煮9款港式美食畀當地400個貴賓享用，仲會開工作坊教整簡單點心。為咗配合當地人胃口，佢哋要整定600人分量，亦即係負責整糯米雞嘅富哥，足足要準備600份雲腿食材。


提早去華人超市搵600份食材

富哥同Emily講，雲腿係中國食材，當地供應商未必識搵，搞到今朝就要飛嘅佢都幾閉翳，唯有寄望喺華人超市搵到，如果唔係就要用其他食材代替！

除咗靠美食宣傳，旅發局今次仲帶埋本地設計師林偉而整嘅大型裝置藝術，運去美國展出，該局總幹事劉鎮漢（Anthony）話，2012年來港美國客超過120萬人次，單計過夜旅客消費額有62億港元，即係人均消費有成7000幾蚊，係繼內地客之外最高。最近美國經濟好番唔少，Anthony話旅發局會積極宣傳，希望擴闊客源。