鹹肉糉造棺材入圍

【明報專訊】講起香港非物質文化遺產，若果港式奶茶列入其中，相信大家都唔會好意外，之不過，連鹹肉糉、整臘味，甚至整棺材都榜上有名嘅話，未知大家又會覺得點？

貼揮春刻墓碑上榜

早兩日，非物質文化遺產諮詢委員會，按照科大華南研究中心普查結果，整咗份香港非物質文化遺產清單，有477項建議。噚日Emily喺最新嘅立法會民政事務委員會文件見到呢份清單，原來其中80項係來自唔同地方嘅盂蘭勝會，其他建議項目都幾多元化，包括製作棺材、整雨傘、墓碑刻雕、貼揮春、舒筋活絡嘅蛇酒，以至各式太極拳系列，都喺名單之列（見表），睇到Emily哭笑不得，合唔合適就真係見仁見智了。


至於較為「正路」嘅建議都有唔少，除咗港式奶茶，仲有大坑舞火龍、長洲飄色、盆菜同埋活字印刷等。


奶茶火龍有份 待立會審議

篩選出來嘅477項只係政府建議嘅清單，之後仲要經立法會同政府諮詢委員會審議，然後由政府決定會唔會將甄選出來嘅項目，向聯合國教科文組織，爭取成為非物質文化遺產。