消除歧視性小眾諮詢組成立

【明報專訊】政府遲遲唔肯就反性傾向歧視條例展開立法工作，但噚日就宣布成立「消除歧視性小眾諮詢小組」，就性小眾被歧視嘅關注，向政制及內地事務局局長譚志源反映意見，主席係平機會前主席張妙清，成員包括「出櫃議員」陳志全，同埋係虔誠基督徒嘅經民聯梁美芬。


無明光社 張妙清任主席

小組將取代以前嘅少數性傾向人士論壇嘅職能，政府話，希望藉呢個平台訂立消除性小眾被歧視嘅措施。除咗陳志全同梁美芬呢個可能充滿火藥味嘅組合，獲邀加入有香港彩虹執行幹事陳諾爾、女同學社執行幹事「小曹」曹文傑、「變性人」梁詠恩、浸大宗教及哲學系主任關啟文同民主黨涂謹申等，但明光社就無份。


何秀蘭﹕唔會收貨

早前發起成立「大愛同盟」兼大搞同志平權議題嘅工黨何秀蘭，對無獲邀感失望，話自己「好想做」。佢話，過去政府委任少數性傾向人士論壇成員時，已試過將兩堆觀念南轅北轍嘅人擺埋一齊，雙方不但達唔到共識，同志團體更集體退出，「你將陳志全同梁美芬擺埋一齊，會傾出啲乜？咪都係各講各話」。佢話唔會收貨，一定會繼續爭取到政府為反性傾向歧視立法為止。


平機會主席周一嶽歡迎成立諮詢小組，重申平機會將繼續支持性小眾，令佢哋嘅權利獲尊重。