自由黨被投訴歧視綜援人士

【明報專訊】自由黨向來打中產牌，為爭取屬納稅人嘅中產支持，早前大打反對濫用綜援議題，要求政府為失業綜援設立兩年期限，仲要領取失業綜援嘅人士，每周要完成40小時社區服務。此舉搞到關注綜援政策聯會向平機會投訴，話自由黨有歧視領取綜援人士之嫌，要求佢哋道歉。


自由黨噚日發出新聞稿，「強烈譴責聯會抹黑自由黨」，仲話對方打壓言論自由。自由黨反濫用綜援發言人李梓敬話，雖然聯會指出，部分人因為身體健康、或須照顧家庭而無法外出工作，但佢質疑若係有長期病患，點解佢哋唔交出醫生證明，申領傷殘津貼而要拎失業綜援？


李梓敬又質疑，如果有人以照顧家庭等理由領取「失業綜援」，已經係有濫用綜援之嫌。佢仲話，其實香港唔少家庭都有兩公婆一齊外出工作，用照顧家庭為由而唔出去做嘢，理據根本站不住腳咁話。