盛讚湯圓明 暗窒熊抱警

【明報專訊】公民黨陳淑莊今日開show，噚日為佢呢個騷作最後排練，適逢今日係端午節，Tanya噚日就拎糉嚟開玩笑，佢話，戰國以來，愛國嘅人都好鍾意扔嘢落海，例如用糉令魚唔好食屈原遺體，所以扔一億蚊落海都係好少。Tanya又話廉署最近除冲咖啡，仲出咗「酒心湯圓」，「盛讚」前廉政專員「湯圓明」幫女朋友準備埋愛心當歸湯，真係女性恩物咁話。


今次話劇叫《出得嚟環》，當然同佔領中環有關。Tanya噚日話，希望觀眾睇完後，會覺得有啲嘢應大家一齊做。佢話今次做呢個話劇，比上次開show仲緊張，因為出面會更有要求。事實上，Tanya噚日上台預演時仲有少少甩嘴，不過，佢想盡善盡美，就話噚日都仍然想加對白喎。


扮「梁二嫂」好抵死

Emily覺得最好笑嘅，始終都係Tanya噚日扮「梁二嫂」，因為真係好神似。睇佢用有口音嘅普通話，笑住話香港啲警察，因為覺得香港警察比內地公安熱情好多，「一見到你就抱住你，仲要不分男女」，真係好抵死，擺明暗窒早前為保護特首梁振英熊抱女示威者嘅男警。Tanya個talk show本來有7場，家加3場仲有飛，要買就襯手喇。