永義買平保 即買即坐艇

【明報專訊】本業為成衣製造嘅永義國際（1218）近期有唔少新搞作，除咗上個星期以近5000萬連租約買到九龍城延文禮士道14及16號舊樓剩低的業權，打算用嚟長線收租之外，近期仲密密掃入平保（2318）股份，話睇好公司嘅表現，不過平保股價唔爭氣，昨日收報56.4元，計番永義之前買入平均價要61.59元，即係唔計手續費，帳面都唔見咗140萬元。


永義通告話，原來由舊年11月19日到昨日（11號）為止，一直有透過全資附屬公司喺公開市場，買入合共接近27萬股嘅平保Ｈ股股份，已等同平保全部已發行股本嘅0.0034％。買入價介乎56.4元至67.4元，平均價要成61.59元，埋單計數，總成本要成1662.8萬元，全部畀現金找數。永義最後仲加多句，話買平保股份係「有吸引力的投資」。平保股價未來走勢小琴就唔敢包，但係睇番佢由年頭最高71蚊，跌到家56.4蚊，跌幅成26％，都咪話唔犀利。