新聞類別
副刊
詳情#
【明報專訊】日式生活百貨店MUJI近排有新搞作，除咗賣日常用品同零食外，家佢連餐飲都撈埋。話說MUJI之前圍板裝修嘅利舞臺廣場分店，噚日重新開幕，裏面加多咗個「Cafe & Meal」餐廳，咖啡、甜點，乃至快餐都有得食，噚日頭一日開張，已經吸引咗唔少人幫襯。
小琴本來都想試吓佢個lunch menu，但一行埋去睇後，都係忍唔住走去幫襯平時食開嗰間茶記。問題不是出在食物上，而係價錢貴到令人卻步——MUJI好似人哋茶記咁推出咗個3餸飯、4餸飯（個名其實好聽啲，叫做「3品」同「4品」飯），但差唔多要成百蚊先食到。真係估佢唔到，原來茶記「N餸飯」都可以咁樣「轉型升級」﹗
主打健康食品 餐牌日日轉
不過MUJI推出嘅「3品」同「4品」飯，又確係比茶記考究啲嘅，公司話個餐牌會日日轉，又會因應唔同季節引入新食材。最大特色係，佢主打健康食品，同埋比較素淡嘅口味，呢個賣點話唔定會大受女士歡迎呢﹗
今次MUJI重開嘅利舞臺店，一共有兩層，面積達1.6萬平方呎，公司話總投資額高達2500萬元咁多。除咗餐廳外，呢間舖仲引入咗一個新企劃「Found MUJI」，會從世界各地蒐羅一啲特色生活用品畀顧客。
無印良品香港董事總經理孔慧蘭話，今年內希望仲可以多開兩間分店，選址除咗考慮港、九外，新界都有機會。繼「3品」同「4品」飯後，唔知MUJI日後又會引入咩新元素？
留言 (0)
