神十升空 港航天股谷唔起

【明報專訊】神十噚日順利升空，再次揭開中國航天史嘅新一頁，小琴都有睇電視直播㗎。內地除咗一連串關於3位太空員同升空任務嘅話題之外，股民最關注嘅就係會唔會好似之前神八同神九咁，帶起一批航天股股價齊齊飛升。


A股明開市 或有追捧

雖然呢3日因為端午節假期，內地A股休市，不過分析就話，每次一有飛船升空，啲概念股都會炒番幾日，所以預計聽日A股開市，神十概念就有得追捧。可惜嘅係，內地睇好神十概念，但香港嘅航天概念股就真係唔多生性，谷唔起不特止，仲要跟住個市跌落去。好似隻航天控股（0031）同中航科工（2357）就跌咗3%，唯一生性少少嘅只有中國航空工業（0232），有8%升幅，總算搭到火箭啦。


之不過咁，其實最受惠神十嘅概念股，應該係嗰隻做航天儀表嘅中國高精密（0591），可惜亦都因為佢哋有呢啲「國家機密」業務，搞到家都仲停緊牌，真係想飛都飛唔起。