民主黨扒龍舟包尾

【明報專訊】一年一度嘅端午節，唔少政黨忙於派糉，亦係佢哋組隊扒龍舟嘅時候，民主黨噚日就喺立法會議員胡志偉領軍下，出戰西貢龍舟公開賽，最終喺7隊中以第五名姿態衝線——不過其實係包尾囉。


社民連帶「賤糉」示威

點解呢？因為民主黨參與嗰場比賽中，有一隊冇嚟、有一隊就被取消資格，意味「第五名」嘅民主黨其實係最尾。胡志偉噚日既負責打鼓，亦試過落手扒，踩開單車嘅佢話自己體能一向唔錯，所以扒完龍舟都冇散晒。對於參賽成績，佢話今年比上年遲埋班，亦冇預早操練，所以志在參與，希望下年可以早啲組隊加緊練習喎。


民主黨人扒龍舟，社民連噚日就去咗大埔海濱公園，向出席龍舟嘉年華嘅署理特首林鄭月娥示威。佢哋拎住幾個糉形道具，話呢啲係「賤糉（諧音﹕種）」，要求梁振英落台。不過，現場保安唔畀佢哋進場，到林太離開時，亦有重重保安護駕，長毛梁國雄事後就聲稱，畀幾名不明來歷嘅橙衣男子踢腳兼撞心口，質疑著制服嘅警察留守後方，對有人採取暴力都唔執法，反而由疑似國保嘅人出手打壓示威。