黃國健派糉 唔敢買平貨

【明報專訊】人哋成日話建制派成日為街坊提供「蛇齋餅糉」優惠，事實上唔少議員過時過節都會向街坊送上心意。工聯會黃國健（KK）噚日喺facebook上載幾張向街坊派糉嘅相，雖然噚日先係端午節，但原來KK早喺上星期六已經派咗端午糉喇，主要派畀長者同義工，佢話今年食材貴咗，但都唔敢買啲平糉，驚食壞人咁話。今年KK喺慈雲山、油塘同秀茂坪嘅辦事處分別都派咗300至400隻，都咪話唔重皮。佢話年年都係咁派，但工聯會其他議員派幾多，佢就唔係好清楚。


民建聯副主席蔣麗芸（Ann）話，佢嘅辦事處今年無預算派糉，但佢知道部分區議員有派糉畀街坊，主要係老人家同義工，幾多就唔清楚。Ann姐又話，佢噚晚已經同爸爸蔣震一齊喺屋企食飯過節。