嫻姐議辦開張 無預張建宗

【明報專訊】工聯會陳婉嫻以超級區議員界別晉身立法會，選區變成全香港，服務市民唔容易。做咗議員大半年，嫻姐終於衝出老巢黃大仙，喺沙田乙明邨開佢首個黃大仙以外嘅個人議員辦事處，嚟緊星期日開幕，而乙明邨正正係政制及內地事務局副局長劉江華從政嘅發迹地。作為工聯會阿姐，政府當然重視，政務司長林鄭月娥當日會做主禮嘉賓，至於好多議題需要合作嘅勞工及福利局長張建宗，對唔住喇，嫻姐無邀請喎。


喺去年嘅長者生活津貼撥款問題上，政府企硬唔肯免審查畀所有長者都攞到，嫻姐對此仍然有氣，仲話歷史會證明佢係啱。佢透露噚日喺地區遇到一個80歲阿伯，對方大罵特首梁振英點解要審查長者先可以攞長津，嫻姐就同對方講，「梁振英唔係最錯，張建宗先係最錯」，可見怨氣幾重。


嫻姐讚林鄭肯聽意見

嫻姐噚日同傳媒茶敘，佢話張建宗雖然勤力，但就無勇氣衝出原有政策，仲話下年度立法會將會加入番人力事務委員會，迎戰標準工時。至於林鄭月娥呢？嫻姐就大讚對方肯聽意見，但形容對方做嘢太辛苦，瘦到可以做修身代言人。


嫻姐喺地區有唔少fans，佢話單係上個月去黃大仙辦事處就處理咗多達893宗個案，佢今次喺沙田開辦事處，亦有意加強九東以外嘅地區工作，但就大呻都幾貴租，百幾呎房協舖租要成6000蚊！