謝瑞麟內地買婚戒 送求婚服務

【明報專訊】謝瑞麟（0417）舊年業績大倒退，好大部分原因係做多咗品牌推廣。事實上，謝瑞麟喺內地嘅宣傳攻勢一直都比較弱，遠遠唔似周大福（1929）、周生生（0116）咁落力。不過，小琴聽謝瑞麟嘅財務董事黎子武話，集團近期喺內地推出一項求婚服務，專門幫助男士以謝瑞麟嘅場地來向女朋友求婚，呢項服務係唔收錢嘅，只需要男士買一對謝瑞麟婚戒就得。


據介紹，有一次有個男仔就係事先買好對戒指，求婚當天就借機帶女朋友來行街，「無意中」行到謝瑞麟舖頭就入嚟睇睇。謝瑞麟一早已將店舖裝飾一番，有紗幔拱門和鮮花佈置，就等男仔睇準時機求婚。


建立婚嫁專家形象 吸引媒體報道

謝瑞麟認為，咁樣做不單止可以喺年輕人心目中建立番婚嫁專家嘅形象，亦都吸引當地媒體爭相報道，算是一個一舉兩得嘅品牌推廣。但公司都話真係用到呢個服務嘅人就唔多，因為未必人人都鍾意喺珠寶店求婚嘛！