稅局換帥 黃權輝坐正

【明報專訊】政府公布高層官員改動，稅務局長朱鑫源本月20日退休了，職位會由副局長黃權輝升任。朱鑫源不經不覺喺政府服務咗38年，佢腳頭都算幾好，任內稅收唔錯，庫房近年成日水浸，好似上年度總稅收就達到2422億元，按年升2％，再創歷史新高。


朱鑫源服務38年退休

將坐正局長嘅黃權輝同朱鑫源一樣，都係稅局「紅褲子」出身，1982年加入政府，由助理評稅主任做起。公務員事務局長鄧國威就話，黃權輝具備豐富稅務管理專業知識及行政管理經驗，相信佢可以帶領稅務局面對未來挑戰。鄧國威亦表揚朱鑫源嘅工作，祝願佢退休後生活愉快。


另外，政府公布，前中西區民政事務專員吳靜靜，將於本月20日起接替李百全，出任公務及司法人員薪俸及服務條件諮詢委員會聯合秘書處秘書長。吳靜靜現年44歲，佢過去一年獲政府推薦，去咗美國哈佛大學修讀一年嘅碩士課程。