民主黨籌款增 歸功WhatsApp

【明報專訊】民主黨每年都會賣獎券籌款，該黨主席劉慧卿透露，今年獎券籌款成績唔錯，共籌到256.6萬元，比舊年175.5萬元多咗四成幾。對於有咁好成績，劉慧卿話好多謝黨友同市民支持，今年10月4日佢哋會再喺尖沙嘴The ONE商場搞黨慶籌款，希望再下一城。


民主黨籌款委員會家由李華明打骰，卿姐就話佢自己最近學識用WhatsApp之後，都覺得好好用，因為可以喺短時間內掌握事態發展，好似早前佢哋賣獎券，有黨員因為落大雨成績唔太好，佢哋都有用WhatsApp鼓勵士氣，互相支援，仲可以互相補位，最終先有呢個佳績。


泛民都有個group

有記者打蛇隨棍上，問卿姐加入咗幾多個WhatsApp group，卿姐話除咗黨團同中委外，佢沙田支部、籌款委員會等都有群組，最意外係原來連泛民之間都有一個，卿姐笑言有時有事發生，都會叫大家唔使話畀佢聽，WhatsApp就得！