過百高登巴打帳戶被封

【明報專訊】高登討論區一向都係唔少網民發表時事政治睇法嘅地方，不過同時都惹嚟唔少是非，話說有高登巴打絲打前日開始發現帳戶被封鎖，涉及帳戶過百，質疑係咪因為有巴打絲打之前籌錢登報紙廣告，批評建制派捐1億賑災地震有關，又有人推斷高登已經將管理權雙手奉上咁話。


「無意打壓言論」

高登噚晚喺網站發表聲明，解釋停用帳戶係因為有人發放誹謗言論。高登行政總裁林祖舜同Emily解釋，以前刪完帖（post）再畀會員重發，最終搞到討論區要負上法律責任，曾經畀人罰錢，又要道歉，故此佢哋會睇帖內容，係咪涉及法庭判決界定嘅誹謗言論，一發現就會停止帳戶同刪帖。


另外，有唔少會員有多過一個帳戶，其實一直都唔容許，認為「你有5把口，我得1把口，你一定大聲過我」，所以同一時間會封鎖埋佢哋。林祖舜強調，絕對無打壓巴打絲打言論意思，仲話過去、現在同將來，都會支持討論區百花齊放，相信將來就版權條例修訂等議題，大家都會企喺同一陣線。


巴打不滿通知都冇就刪

有被刪帳戶嘅高登巴打John就話，唔滿意林祖舜粒聲唔出就做嘢，通知都唔畀番一個，要佢講番誹謗嘅準則，等佢哋有得提防，認為林祖舜處理有好大改進空間。