劉鳴煒講商界扶貧﹕捐錢係基本功

【明報專訊】智經研究中心噚日同社聯合辦一個關於商界參與扶貧嘅論壇，主持智經副主席劉鳴煒話，商界其實有唔少有心人，好想參與扶貧工作，而捐錢係「最基本嘅基本功」，仲有好多以外嘅事可以做，但之所以好多時落實唔到，係因為「搵唔到伙伴」，或者同心中概念有落實困難。


智經發言人同Emily講，劉先生所指商界「搵唔到伙伴」扶貧，係因為唔清楚點接觸受助群，例如中小企想幫釋囚等更生人士，商界未必有途徑接觸到。


論壇座上客之一嘅關愛基金執行委員會主席羅致光，笑住咁講基金仍然歡迎商界捐錢，不過就無努力去「揼人心口」。政務司長林鄭月娥為論壇致辭時就講到，扶貧委員會秘書處今個月底會邀請智經代表出席扶貧委員會轄下嘅社會參與專責小組會議，同一眾委員交流。