陳婉嫻趁父親節

【明報專訊】工聯會立法會議員陳婉嫻喺沙田乙明邨嘅辦事處噚日開幕，政務司長林鄭月娥畀面出席，雖然係父親節，但噚日出席嘅男士亦唔少，鄉議局主席劉皇發、沙田區議會主席何厚祥亦坐足全程，工聯會黃國健、郭偉強、鄧家彪當然要支持嫻姐啦。嫻姐亦趁機向林太爭取標準工時，話有標準工時立法，就可以令天下父親有更多時間陪家人喇。


林太就形容嫻姐同佢自己好似，都係「工作狂」，佢話雖然嫻姐喺勞工議題上畀壓力佢，但知道對方其實都放咗好多時間美化城市，好似九龍城區、啟德河等發展，嫻姐畀好多意見。


4歲女送紙呔 鄧家彪好冧

而鄧家彪就帶埋老婆同4歲囡囡賀嫻姐辦事處開幕，佢透露阿女首次送上父親節禮物，就係用紙整咗條寫上「I love DAD」嘅領帶畀佢，笑言早知喺周六有關父親節嘅記者會上，就打埋條紙呔出嚟曬幸福啦。至於仲未結婚嘅郭偉強有冇計劃做爸爸呢，佢就話女朋友肯結婚先再講啦。