許崇德收服梁美芬

【明報專訊】唔少人都知道經民聯立法會議員梁美芬讀法律，當大家1980年代都去英美法國等地留學時，佢已決定返內地讀書，仲師承前基本法起草委員許崇德，所以梁美芬家城大教法律，都係講《基本法》同中國法律。唔好睇梁美芬家咁建制，佢話後生時試過考試嫌試卷程度太淺，最後交白卷以示抗議。

嫌填充題試卷太淺

當年中大讀書梁美芬都好激進，試過抬棺材抗議，到佢去北京讀法學碩士同博士學位時同樣好激，有一次見到考卷係填充題，就嫌程度太淺，以交白卷抗議。

咁最終教授點「收服」佢呢？梁美芬話負責教授《基本法》許崇德循循善誘，以自己親歷文革、改革開放經驗，引導佢以唔同角度理解同研究內地法律，梁美芬形容對方對中國、對法律熱情「融化」佢，令佢明白中國法律改革唔可以一步登天。

雖然畢業多年，但梁美芬同許崇德關係仍然好好，現時梁美芬每次上京，都會抽時間拜會已經85歲恩師，仲帶埋一家大細去。