龔如心愛木化石 皆因似堅貞嘅愛？

【明報專訊】華懋集團龔如心（小甜甜）已經去世，但有關佢嘅新聞近日唔少，而華懋集團最近又有新搞作，就係喺荃灣如心廣場2樓起咗個「如心化石公園」，個名非常精警。呢個8萬平方呎嘅公園展出咗127塊小甜甜生前收藏嘅天然木化石，其中一塊長達25米，「年紀」最大嘅有5000萬歲。公園噚日搞開幕活動，龔家成員龔中心同龔仁心都有出席。


127件收藏品 最老5000萬歲

龔中心話，姐姐龔如心生前興趣廣泛，特別喜歡收藏各式藝術品。天然木化石每塊都獨一無二，經過千百年風吹雨打而成，就好似堅貞永恆嘅愛，所以龔中心相信姐姐就係睇中呢點，將木化石當藝術品咁收藏。


化石研究學家鄭少林教授話，木化石見證咗地球幾千萬年來嘅氣候變遷，係研究古生物同地質等嘅重要線索。


噚日父親節，最近龔仁心兒子龔皓遇襲，龔仁心話為咗出席開幕活動，所以唔得閒同家人慶祝。佢話囝囝家情况幾好，多謝大家關心，但被問到囝囝遇襲原因、有無得罪人等問題時，佢都話「唔知、唔清楚」。


如心化石公園免費對外開放，全場127嚿化石任摸唔嬲，星期日仲會有免費導賞，可以接待200名市民。