CY煲呔碰杯握手

【明報專訊】《大公報》噚日舉行111周年報慶酒會，特首梁振英同立法會主席曾鈺成都有到賀。但係最搶眼嘅係前任特首曾蔭權，仲同梁振英同場碰杯握手，不過煲呔無回應有關前廉政專員湯顯明接受廉署調查嘅提問，有人問佢點睇梁振英咁低民望，佢亦當無聽到。


曾蔭權同梁振英本來喺上台時仲係無乜交流，但上到台之後，曾蔭權專登等梁振英上前，同梁舉杯祝酒。梁振英喺頒紀念品畀曾蔭權時，亦有同佢握手，但曾蔭權喺宴會食飯前就已好低調閃人，搞到記者一度唔知佢去咗邊。


曾鈺成喺台上致辭話自己半世紀前已經嘅「大公之友」，因為中學時投稿去《大公報》獲得刊登，又話佢工作嘅培橋中學，有好多人喺《大公報》做，該報嘅駐倫敦記者亦係校友。


中聯辦楊健話港記專業

新任中聯辦副主任楊健上台前同記者講咗幾句，佢話自己都做過記者，亦喺廣東工作過，當時見到香港媒體非常專業敬業，仲好主動提問。佢希望盡快融入香港工作，做好內地香港溝通交流嘅橋樑。楊健早前獲國務院任命，接替郭莉出任中聯辦副主任。