創業板新股奇葩 寶聯單日升2倍

【明報專訊】近期市况唔好，集資較多嘅新股如合和香港房地產（0288）都臨門「撻Q」。反而用配售方式嘅創業板新股就較有睇頭，噚日上市嘅清潔同環保服務供應商寶聯控股（8201）就係一例，招股價只得1.2元，但適逢升市，爆升2.37倍，高見4.04元，成為奇葩。


創辦人家族持股價值 4年升7倍

寶聯細細隻，但係背景唔簡單，原來創辦人范石昌同啲拍檔喺2001至2002年期間，曾經將盤生意賣畀新創建（0659），之後接好多新世界系同利福（1212）嘅清潔服務生意，到2009年3月，因為新創建要專注核心業務，結果范生出價3450萬元買番盤生意。


業務與新創建關係大

用噚日收市價計，寶聯市值達4.04億元，范石昌家族持股70%都值2.83億元，事隔4年大升7.2倍。范噚日宴請傳媒時講，佢哋同新創建仲保持幾十年友好關係，100份合約生意，起碼有26份同新世界有關。


新創建仲幫助寶聯轉型，變得更企業化，間接促成今日寶聯上市。佢哋現時仲係全港少數做外判酒店執房同茶水房阿姨嘅清潔公司，將來佢哋會大搞利潤更高嘅處理機密文件生意，實行廣開財路。