醫學會兩巨頭鬧分歧

【明報專訊】香港大學法律系副教授戴耀廷搞「佔領中環」運動搞到沸沸揚揚，今日佢會去中環嘅醫學會會所同醫學會會董食午飯。發起呢個「佔中飯局」嘅係醫學會前會長蔡堅，佢話收到好多醫生電話，問關於佔中運動究竟係搞乜嘢？若果參加佔中，會唔會犯法、有乜後果？會唔會冇咗個醫生牌？蔡堅話呢啲問題佢唔識答，提議「請戴教授嚟醫學會董事會例會晚飯，解答一下醫生好想知嘅問題」。


謝鴻興：佔中係犯法行為

蔡堅叫戴耀廷做戴教授，對佢好尊重，點知，佢畀醫學會會長謝鴻興潑一頭冷水，謝話佔中係犯法行為，唔批准戴嚟醫學會例會講嘢。但係蔡堅企硬冇讓步，仲有啲勞氣：「未了解件事，唔可以隨便就話佔中係犯法嘅活動。」佔中飯局照搞，但改為午飯，仲改用醫學會「功能組別過渡至普選」專責委員會嘅名義搞飯敘，蔡堅就係委員會主席。


蔡堅：未了解唔可以話犯法

Emily問蔡堅，謝鴻興今日會唔會嚟飯局同戴耀廷見面？佢答「No」，副會長周伯展同埋陳以誠，仲有史泰祖等10多名會董就話會嚟，但史醫生話唔想咁激，唔會撐佔中。