性小眾小組 首次開會好和平

【明報專訊】政府暫時唔肯搞立法消除性向歧視，但就成立性小眾諮詢小組，拉埋反同性戀、不同性取向團體嘅人士，話想大家先傾吓點樣消除歧視。


約見各方團體達共識

小組噚日開第一次會，呢班人立場雖然南轅北轍兼性格惹火，但噚日大家都以禮相待，雖然有爭論，但未有拍枱翻櫈。大家仲有一啲共識，話可以搞民調睇吓市民點睇性向歧視問題，又話會約見各方團體，收集不同意見。


呢個小組由前平機會主席張妙清教授任主席，成員有同志身分嘅「慢必」陳志全，又有教徒梁美芬、涂謹申等。據與會者話，噚日主要係講小組嘅工作計劃，大家都同意，可以約見性小眾嘅組織，亦會聽反對同性戀嘅教會立場，更可以做民意調查，了解市民點睇性向歧視問題。會上，大家大致認同社會唔應該有歧視。


小組能夠務實討論係有原因，因為佢哋有排都未討論到戲肉：立法消除性向歧視，相信只要講到立法，唔同團體到時難免壁壘分明。