民記流動辦公室揭幕

【明報專訊】民建聯九龍西議員蔣麗芸（Ann）同埋超級區議員李慧琼（Starry），話家租金貴，決定買架貨van做流動辦事處，呢架貨van用粉紅色做主調，大半個車身貼住Ann同Starry個樣。架車噚日揭幕，阿Ann當然粉紅到尾，著件粉紅色外套，連鞋都係粉紅，相反Starry就只係白色恤衫，好似失色咗少少。


Ann話，貨van會巡迴九西18個點，尤其係無辦事處嘅地方，佢家一個禮拜會跟車3日，分別去油尖旺、九龍城同深水埗，暑假之後會去多啲。


架車外面貼咗佢哋兩個大大個樣，九西街坊離遠都一定認得。


Ann大計多多，下一步打算喺立法會嘅事務委員會，提出深水埗、土瓜灣有污糟後巷，因為呢啲議題，部門之間經常拋波。有行家話，反正後巷咁多老鼠，不如順便捉埋，唔知號稱「鼠王芬」嘅經民聯梁美芬會唔會感受到威脅呢？