幫藝墟檔主阿人想佔領文化中心

【明報專訊】「佔領中環」傾得鬧哄哄，工黨李卓人又話諗緊喺尖沙嘴搞個「佔領文化中心」，今次嘅佔領目的唔係爭取普選，而係要為喺文化中心「藝墟」擺檔搵食嘅藝術家出頭，等佢哋唔好被康文署趕走。


尖沙嘴海旁一向有唔少人擺檔賣手工製品，但康文署呢個月頭話唔會再同佢哋續約，要36檔藝術家約滿走人。為檔主發聲嘅李卓人噚日話唔會咁易妥協，考慮緊聯同班檔主「佔領」文化中心，至於係日頭非法擺檔佔領定係全日佔據？呢啲細節就未決定，要等到星期三同檔主開完會先知。


檔主有人撐有人唔撐

「佔領文化中心」搞唔搞得成Emily唔知，不過噚日同幾個檔主傾過，就有人支持有人反對。支持嘅李先生（62歲）喺藝墟2001年成立時開始擺檔，掙到嘅錢養大咗3個細路，仲有餘錢助養內地貧困兒童，佢話康文署就算唔續約，都會自己返嚟繼續擺地攤為生。不過，專賣高檔木製品嘅何先生（73歲）話自己係為興趣而雕木擺賣，冇咗藝墟就自己喺屋企雕，唔會一把年紀去搞佔領咁話。