「少年Ben」半裸扒浴缸搶鏡

【明報專訊】雖然端午節過咗，但噚日旅發局就搞咗個龍舟嘉年華，當中包括名人扒浴缸賽，民主黨單仲偕、民建聯陳恒鑌（Ben）、經民聯張華峯、獨立謝偉俊都有參加，唔少人都花盡心思扮鬼扮馬，其中阿Ben就模仿電影《少年Pi的奇幻漂流》主角造型，半裸上陣做少年Ben，佢嘅拍檔、荃灣區議員黃偉傑就扮戲中嗰隻老虎Richard Parker，博到咁盡，當然贏得造型大獎啦。


至於好大件頭嘅張華峯，就戴鴨仔帽同鴨仔頸鏈，著埋黃色衫，成個肥鴨造型上陣，十分可愛，佢話帽同頸鏈上嘅鴨仔，全部都由黨友林健鋒提供。咁重磅去扒浴缸當然有啲難度，張華峯無反浴缸跌落海，已經算幾叻，佢話最緊要同隊友兩個都坐正中間，唔好亂郁，佢事前無同隊友夾過，成功完成100米賽事都算係咁咯。不過咁重可能好難扒，最後難逃包尾命運。


單雞練習時翻艇 比賽奪冠

而喺練習時曾經翻浴缸墮海嘅單仲偕就威喇，以最短時間完成賽事稱冠，佢喺賽後話，其實最大目標係令浴缸唔好翻，佢哋嘅策略就係中段先發力加速。不過「單雞」造型就比較頹，只係戴咗個雞仔頭套就算。至於呢兩日嘅龍舟嘉年華吸引咗22.8萬人嚟湊熱鬧！