論功能組別卿姐被「滅聲」

【明報專訊】噚日港台《城市論壇》，「卿姐」劉慧卿同民建聯張國鈞為咗廢唔廢除功能組別拗來拗去，連個天都好似想為維園降一降溫，喺論壇中段突然落起大雨，現場音響器材即刻故障失靈，喇叭同咪全部冇晒聲。當時正值卿姐發言，講講吓冇咗聲，佢笑言自己係咪被人「滅聲」。


落雨器材失靈

台上講乜嘢，下面嘅觀眾當然聽唔到，不過即使同喺台上討論嘅嘉賓坐得咁近，都好似聽唔到對方講乜嘢咁，4個嘉賓各自講咗成10分鐘都冇交流。好彩電視出街係有聲有畫，Emily仲可以上網重溫，知道嘉賓嗰時喺台上口噏噏做緊乜。