七一遊行10周年 民陣出書賣襟章

【明報專訊】民間人權陣線下星期一、即係七一當日會如常舉辦遊行，今年係民陣舉辦七一遊行10周年，佢哋除咗一如往年推出主題T恤，亦特別有多幾款紀念品，記錄過去七一遊行情况，其中仲出咗本書《民陣十年 700萬人的故事》，搵參與過嘅人同團體寫番2003年七一遊行至今10年嘅感受、評論等，全書200幾頁，七一價71蚊。


民陣又會推出歷年來七一遊行嘅襟章同明信片，襟章就以過去十年遊行主題徽號製作，好似03年當然係反23條、2010年就係普選火鳳凰嘅標誌，一套10個盛惠30蚊；明信片就印咗每年遊行情况，一套10張賣20蚊。如果市民想買齊書、明信片同襟章，全套優惠價就係100蚊。


連明信片一套100蚊

Emily早前提過，今年民陣T恤分別印上「Do You Hear The People Sing」以及有關佔領中環3個款式，民陣話前者已經差唔多斷貨，已經加印，等市民喺七一當日都可以買到。今年民陣籌得款項，扣除開支後將會全數捐畀佔領中環秘書處。


除咗民陣，政黨亦會趁七一賣嘢籌款，其中公民黨就會有印咗小紅帽同以「忍無可忍」做主題嘅毛巾同T恤。